കൊച്ചി: നഗരമധ്യത്തില് രണ്ട് വിദ്യാര്ഥിനികളെ അതിക്രൂരമായി ആക്രമിച്ച കേസിലെ മുഖ്യപ്രതി പി. അക്ബര് അലിയെ എറണാകുളം നോര്ത്ത് പോലീസ് ഉടന് കസ്റ്റഡിയില് വാങ്ങും. റിമാന്ഡിലുള്ള ഇയാളെ കസ്റ്റഡിയില് ലഭിക്കുന്നതിനായി പോലീസ് അടുത്ത ദിവസം കോടതിയില് അപേക്ഷ നല്കും.അക്ബര് അലി കണ്ണിയായ സെക്സ് റാക്കറ്റിനെക്കുറിച്ചുള്ള വിവരങ്ങള് കണ്ടെത്താനുള്ള ശ്രമത്തിലാണ് അന്വേഷണ സംഘം.
കേസില് അറസ്റ്റിലായ എടപ്പാള് സ്വദേശിനികളായ എ.കെ. തെസ്നി, തെസ്നി ഷെറിന് എന്നിവരെ കോടതിയില് ഹാജരാക്കി റിമാന്ഡ് ചെയ്തു. ഇവരെയും കസ്റ്റഡിയില് വാങ്ങി അക്ബര് അലിയ്ക്കൊപ്പമിരുത്തി ചോദ്യം ചെയ്യാനാണ് അന്വേഷണ സംഘത്തിന്റ നീക്കം. യുവതികളുടെ പേരില് മറ്റ് കേസുകള് ഇല്ലെന്ന് സ്ഥിരീകരിച്ചിട്ടുണ്ട്.
ആക്രമണത്തിനുശേഷം യുവതികള് അക്ബര് അലിയുടെ കാറിലാണ് കോഴിക്കോട് ഉള്പ്പെടെയുള്ള ജില്ലകളില് പോലീസിനെ വെട്ടിച്ച് കറങ്ങിനടന്നത്. ഇരുവരും കൊച്ചിയില് കോസ്മറ്റോളജി പഠിക്കാനും പാര്ട്ട്ടൈം ജോലിക്കുമായി എത്തിയതാണ്. അക്ബര് അനാശാസ്യകേന്ദ്രം നടത്തുന്നത് ഉള്പ്പെടെയുള്ള വിവരങ്ങളും ഇവര്ക്ക് അറിയാമായിരുന്നെന്നും പോലീസ് കണ്ടെത്തിയിട്ടുണ്ട്. ഇനി അറസ്റ്റിലാകാനുള്ള നാലു പേര്ക്കായി അന്വേഷണം ഊര്ജിതമാക്കി.
കഴിഞ്ഞ ചൊവ്വാഴ്ച പുലര്ച്ചെ 4.30ന് കലൂര് ജംഗ്ഷനടുത്ത് ചക്കാലപ്പാടം റോഡിലാണ് പത്തംഗ സംഘം വിദ്യാര്ഥിനികളെ ആക്രമിച്ചത്. പിടിയിലായ മലപ്പുറം എടപ്പാള് സ്വദേശി ആല്ബിന് സൈമണ്, മണ്ണാര്ക്കാട് സ്വദേശികളായ സാബിത്, അരുണ് എന്നിവര് റിമാന്ഡിലാണ്.